أدب وأشعار
على القهوة
بقلم / إيمان أحمد يوسف مصر
ع القهوة
شاي ويا تماسى
وناس همومها
على الكراسى
وصواني دايرة بحكاويها
ووقت ضايع أو ناسى
ع القهوة
شيشة ودخانه
توصل لصدرك قلقانه
تفاحه نايمة ونعسانة
ع الفحم وانت
اللي هاويها
حكايات تداريها
عناوينها سوده
ف عيونك
ف غفلة عنها تداديها
وهي تحلف ماتفوتك
ع القهوة
نعناع ومداوي
يسحر ف أوجاع ويداري
وأنت اللي ناوي
تكون غاوي
عمرك يضيع على أراضيها
شيش بيش
مافيش حاجه مفيده
ولاساعة من نوعها فريده
واللعبه دايره بتنهيدة
ولاراحه وياك ح تعدي
كوتشينه وضومنو
ولاناس ف وقتك يتضمنوا
ولد يشيل احلى مافيها
شايب يقاسى من زمنه
ع القهوة اغراب وحبايب
الود عنهم شئ غايب
وكل واحد ف القالب
والعمر والله
مالوش صاحب
ع القهوة
تلقى وشوش ووشوش
وقلوب حزينه بتتبسم
ينسون بينسى ويتناسى
والهم على عوده يقسم
من ديوان أحتواني الانتظار
