مقالات وأراء

رحلة لبكرة

بقلم الشاعرة//إنتصار محمد حسين

لما تروح على بكرة
إرمي وراك
سنين الذكرى
واوعى تجيلك فكرة
تاخد منها معاك
..
خلى بكرة بداية
لنهاية قصة دنيا
لعبتها كتير وياك
….
لما تروح على بكرة
خد وياك للأمل زهرة
ترعاها وترعاك

عطر بيها حياتك
إبني بيها ذاتك
وافتح بابك لكل احبابك
اعمل دنيا جديدة سعيدة
مفتاحها على طول وياك
… .
ولما تروح من تاني لبكرة
خد وياك كدة كام فكرة
تحيي حياتك
تِمتِع أوقاتك
تخلق ليك فرحة دنياك
بس ياريتك
ماتعود للماضي
أصل الماضي
عليك مش راضي
يعقد صفقة صلح معاك
واوعى الماضي
ياخد من وقتك
وقتك ضيق
على كل الذكرى
مش راح تتحمل
يجيبلك فكرة
تبَكي عيونك
وانت عيونك
عايزة الفرح
نفسك تنسى
كل الجرح
روح على بكرة
من غير ذكرى
خليك فاكر بس
إنك ..
على جسر احزانك
عديت…
قول للماضي خلاص
مَليت….
قوله يروح لغيرك
كتر ألف خيره و خيرك
ياما اتحملت
ياما اتزليت
وقوله خلاص
جاني الخَلاص
وأديني خلاص منك
عديت……

وانت مسافر على بكرة
خليك متحصَّن بالحب
أصل الدنيا من غير حب
مبتبعدش كتير ع الموت
هي يادوب فركة كعب
تلاقيك للموت خطيت

وأما تروح تاني لبكرة
خد وياك كدة كام كلمة
منها تتذكر
لما سابوك عايش بتفكر
وانت طريح أحلامك
وفاتوها تروح من قدامك
….
طير كدة ويا الريح
وهتعمل ايه ….؟
ياما كنت جريح
ويوم ماباعوك
كان يوم خذلانك

بس ياريت كل ده عبرة
تتعلم ازاي تكون بكرة
إنسان تاني
مش مخذول
خلى حياتك
كلها نور
واوعى تكون انسان
وحداني…
واوعى تتوه
في بحر أماني
لا ترجع لماضيك
من تاني….
متحاوط بالذكرى
ويروح حلم حياتك لبكرة
تاخدك فكرة
وتجيبك فكرة
..
إرمي وراك سنين الذكرى
وهِم وسافر…….يالا لبكرة

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
مرحباً بكم في الإخبارية العربية هل ترغب في تلقي إشعارات بآخر الأخبار؟ لا نعم