مقالات وأراء

رايح ع الحدود بقلم الشاعرة.. إنتصار محمد حسين

……
رايح ليه يا ابني ع الحدود
اشوفلك واسطة.. تخليك تعود؟
تراعي عيالك.. تحافظ عليهم
تونس مراتك…وتنور لياليهم
بيقولوا هناك …حرب دايرة
ودايرة هناك… مخاطر عليهم

مين هيراعينا في غيبتك مين؟
مين هيلاغينا لو ليلنا حزين؟
رايح ليه ع الحدود؟
عايزينك.. بينا موجود

إسمع كلامي… قلبي عليك
عمك تهامي… في الجيش هيراعيك
يشوفلك واسطة …هنا جنبينا
من وقت للتاني… تطمن علينا
….
يا أمي حياتي بيكي منورة
واجبي اراعيكي …يا حتة سكرة
يا أغلى من حياتي
ومن بيتي ومراتي
ياكل اللي لية
وجنتي بعد مماتي

لكن يا أمي إبنك أصيل
وحُبه لبلده أكبر دليل
و هلبي النِدا …وارد الجميل
وروحي فِدا…. نسيمها العليل

وهناك ع الحدود ..يكون الوجود
وبروحي هجود…و مفيش مستحيل….
راجل أنا …مخافش الموت
وجنبك هِنا… يفوتني الهَنا
وكل إخواتي هناك ع الحدود

راح ابقى حزين ..لويفوتني لُقاهم
ترضي يا أمي
إبنك يعود ويسيب اخواته
هناك ع الحدود؟!

إيه معنى حياتي… ومعنى الوجود
لو كل واحد حب هِنا… وساب الحدود…
راح تيجي الغَدَرة.. وتهجم علينا
مهو أصل الفجرة… مالهومش ضمير…
وساعتها ياغالية هتقولي ياريت

لبيتوا النِدا وحَكِمتُوا الضمير
ياريتك ما اسمعت كلامي… ياريت
ولاعمك تُهامي سِمع كلامي
ياريتني سيبتك ..تروح ع الحدود
..

يا ابني كلامك رَجَّعلي عقلي
راح اهدي حياتك ..لأهلي وبلدي
وان كان على عيالك ..ربك كريم
يحافظ عليهم من أي حقود

ومراتك هتفضل جوة العيون
هشيلها ع الراس.. وجوة الجفون
روح يا ابني يالا.. لتتأخر عليهم
وأمانة ياقلبي.. تسلم عليهم
ودُعايا لربي يحميك ويحميهم
روح يا ابني يالا ربك موجود

وياريت تكون بدالنا ع الحدود..
بلدك أمانة.. لو بروحك… جُوود
راح يفرق معانا.. وجودك ع الحدود…
وربك معانا.. ف بيتك موجود
روح يا ابن قلبي راضية عليك
وهادعي ربي يحافظ عليك

وكل اخواتك هناك ع الحدود
يحميكوا ربي وبالنصر يجود
ولاجلك يابلدي بروحنا نجود
وتعيشي يامصر يا أصل الوجود

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى
مرحباً بكم في الإخبارية العربية هل ترغب في تلقي إشعارات بآخر الأخبار؟ لا نعم